- अश्विनी कोइराला

मंसिर १४, २०७२- 
कर्माछिरिङ शेर्पा, वरिष्ठ उपाध्यक्ष, एन्फा

२०५२ सालमा गणेश थापा अखिल नेपाल फुटबल संघ (एन्फा) को अध्यक्ष हुँदा नेपालको फुटबल सार्कस्तरमा अब्बल थियो । समयक्रमसँगै नेपालको फुटबलको स्तर कमजोर मात्र भएन, फुटबल संरचनाभित्र भ्रष्टाचार र अनियमितताको बाढी नै आयो । ती घटनालाई बाहिर ल्याउने व्यक्तिहरूमध्ये एक थिए— कर्माछिरिङ शेर्पा । आफ्नै संस्थाका अध्यक्षले घोटला गरेका विभिन्न कार्य गोप्य रूपमा पर्दाफास गर्दै आएका एन्फाका उपाध्यक्ष कर्माछिरिङले पछिल्लो समय त्यसको खुलेरै विरोध गर्न थाले । उनकै नेतृत्वमा गठन भएको ‘फुटबल शुद्धीकरण अभियान’ले सरकार, अख्तियार र जनतासम्म राम्रै प्रभाव पार्‍यो । केही अघि गणेश थापालाई फिफाले घुस लिएको आरोपमा १० वर्षसम्म फुटबलका कुनै पनि गतिविधिमा संलग्न हुन नपाउने निर्णय गरेपछि ‘फुटबल शुद्धीकरण अभियान’ नेपालमा मात्र होइन, फुटबलमा चासो राख्ने विदेशी निकायमा पनि चर्चित भएको छ । यही अभियानका प्रमुख कर्माछिरिङ शेर्पासँग साप्ताहिकले गरेको कुराकानी : 

तपाईंहरूले सुरु गर्नुभएको अभियानले सफलता पाएको छ, कस्तो लागिरहेको छ ?
म एन्फाको उपाध्यक्ष भएको १७ वर्ष भयो । सुरुमा गणेश थापाको कार्यशैली बुझ्न एक–दुई वर्ष लाग्यो । म झन्डै १५ वर्षदेखि एन्फाको गतिविधि ठीक भएन, यसको कार्यशैली गलत भयो भनेर लडिरहेको थिएँ । सुरुमा सत्यतथ्य बाहिर ल्याउँदा संस्थालाई अप्ठ्यारो पर्न सक्छ भनेर हामी भित्रभित्रै लड्यौं । उहाँले कार्यशैली सुधार गर्नुको साटो हामीलाई नै गलत ठहर्‍याउन थाल्नुभयो । त्यसपछि हामी बिस्तारै प्रेस, सरकार र अख्तियारतिर धाउन थालेका हौं । अहिले आएर हाम्रो अभियानले सफलता पाएको छ । फुटबल प्रेमीहरू खुसी हुनुहुन्छ । 

यो कुरा पर्दाफास हुन लामो समय लाग्यो, यसले नेपाली फुटबललाई रसातलमा पुर्‍यायो भन्नेहरू पनि छन्, के भन्नुहुन्छ ?
हामीले सबैतिर प्रयास गरेका हौं । संस्थाले गलत काम गरिरहेको छ भनेर गोप्य रूपमा सूचना दिएकै कारण कान्तिपुरले लगातार समाचार प्रकाशन गर्‍यो, अरूले पनि एन्फाको भ्रष्टाचारलाई स्थान दिए, तर उहाँ कति चतुर भने हामीले दिएको सूचना नै गलत हो भन्ने ढंगले प्रस्तुत हुनुहुन्थ्यो । थापामा पत्रकार, राष्ट्रिय खेलकुद परिषद्, खेलकुद मन्त्रालय मात्र होइन सरकारलाई समेत प्रभावित पार्न सक्ने खुबी थियो । यही खुबीका कारण उहाँ २० वर्ष अध्यक्ष हुनुभयो । उहाँले आफ्नो पावर प्रयोग गरेर अख्तियारलाई समेत प्रभावित तुल्याउनुभयो । सुरुमा भ्रष्टाचारको मुद्दा नै दर्ता भएन । दर्ता भएपछि त्यसमा लामो समय लाग्यो । उहाँले यति ठूलो गेम खेल्नुभयो कि अख्तियारले समेत क्लिन चिट दियो । अहिले फिफाले कारबाही नगरेको भए उहाँ अझै शिर उठाएर हिँड्नुहुन्थ्यो । 

गणेश थापाले सरकार, खेलाडीदेखि अख्तियारसम्म प्रभावित गर्नुभयो, यो कसरी सम्भव भयो ?
फुटबलको विकासका लागि विदेशबाट करोडौं रुपैयाँ आएको थियो । फुटबल खेल नेपालमा लोकप्रिय छ । यहीँ पनि टिकट बिक्रीबाट पनि लाखौं रुपैयाँ जम्मा हुन्थ्यो । त्यसबाहेक प्रायोजक कम्पनीबाट साढे ४ करोड रुपैयाँ आएको देखिन्छ । तीमध्ये कति फुटबलमा खर्च भयो, त्यो नै थाहा छैन । यसको अर्थ उक्त पैसामध्ये ठूलो रकम मानिसहरूलाई मिलाउन प्रयोग हुन्थ्यो । एन्फामा आर्थिक नियमावली नै छैन । हामीले आर्थिक नियमावली बनाएर त्यही अनुसार रकम खर्च गरौं भनेर आवाज उठाउँदै आएका थियौं, तर एन्फाभित्र उहाँका मानिस धेरै थिए । आफूलाई मन नपरेको मानिसलाई कारबाही गर्ने र आफ्ना मान्छे भर्ती गर्ने, विदेश पठाउने, विभिन्न किसिमका सुविधा दिने कारणले हामी दुई–चार जनाले मात्र नियामावली बनाउने, उहाँलाई हटाउने जस्ता नीतिगत निर्णय गर्न सकेनौं, त्यसैले उहाँलाई चलखेल गर्न सजिलो भयो । कति पैसा कहाँ गयो, कसरी गयो, त्यसको हिसाब राख्नुपर्ने जरुरी भएन । 

तपाईंको समूहभित्र को–को थिए ?
वियनारायण मानन्धर, किशोर राई र पंकजविक्रम । उहाँलाई चुनौती दिन गीता राणाको अध्यक्षतामा अर्को संस्था खोल्यौं तर अन्तर्राष्ट्रिय रूपमा देशको खेललाई नै अप्ठ्यारो पर्ने अवस्था आएपछि एकीकरण गर्न बाध्य भयौं । अर्को कुरा बाहिर बसेर उहाँका गलत क्रियाकलाप बाहिर ल्याउन सकिँदैनथ्यो । एन्फाभित्र ७२ जना सदस्यमध्ये ५० देखि ५८ जनालाई उहाँ सधैं पकेटमा राख्न सफल हुनुभयो । उहाँका पक्षमा सधैं दुईतिहाइ मत पुग्थ्यो । 

यही बेला म्याच फिक्सिङ गरेर खेलाडीहरूले लाखौं कमाएको कुरा बाहिर आयो । यसमा एन्फा पदाधिकारीहरूको मिलोमतो हुन सक्छ ?
खेलाडीहरूले मात्रले यति ठूलो अपराध गर्न सक्दैनन् । युवा खेलाडीहरू आफ्नो करियर बनाउन चाहन्छन् । उनीहरूलाई खेल राम्रो खेल्नुबाहेक एन्फासँग नजिक हुन मन लाग्छ । यस अर्थमा यसमा एन्फा पदाधिकारीहरू पनि संलग्न हुनुपर्छ भन्ने हाम्रो ठहर छ । सिंगापुरका एक जना व्यापारीले फिक्सिङको अपराध गरेका कारण जेल सजाय पाएका थिए । ती व्यक्तिले खेल पत्रकारहरूको सहयोगमा जेलमै बसेर ‘केलोङ किङ’ शीर्षकको आत्मकथा लेखे । त्यो पुस्तकमा विश्वभरि कसरी म्याच फिक्सिङ हुन्छ भन्ने कुरादेखि नेपालका खेलाडीहरूले कसरी र कहाँ–कहाँ त्यस्तो अपराध गरे भन्ने कुरा उल्लेख गरिएको छ । अनुसन्धानहरूले पनि नेपाली खेलाडीहरूले २३ वटा खेल पैसा लिएर हारेको देखाएका छन् । विश्वप्रसिद्ध खेल साइटको स्पोर्ट राडरको डाटाले पनि उक्त कुरा पुष्टि गरेको छ । यति ठूलो कुरा पदाधिकारीहरूलाई थाहा भएन, उनीहरूको संलग्नता थिएन भन्ने कुरा कसरी पत्याउने ?

यी अपराधबाहेक गणेश थापाविरुद्ध करोडभन्दा बढी घूस खाएको आरोप लागेको थियो । यही आरोपमा उनी निलम्बनमा पनि परे । यस विषयमा तपाईंको भनाइ के छ ?
सबै कुरा पत्रपत्रिकाहरूमा आइसकेको छ । उहाँको छोराको खातामा १ करोड र उहाँको खातामा १ करोड १५ लाख रुपैयाँ आएको पुष्टि भैसकेको छ । उहाँले फिफामा जोसँग पैसा लिनुभएको थियो, उसैलाई भोट दिएको पनि पुष्टि भैसकेको छ । हुन त उक्त रकम फुटबलका लागि सापटी लिएको भनेर थापाले आफ्नो बचाउ गर्नुभएको छ । फुटबलका लागि हो भने त्यो पैसा किन एन्फाको खातामा आएन, उहाँकै छोरा र उहाँको नाममा किन आयो ? यसमा थप कुरा भन्नुपर्छ जस्तो लाग्दैन । गणेश थापा र उनको समूहलाई फुटबलप्रेमीले कसरी माफ गर्लान् र ?

अन्तर्राष्ट्रिय खेलहरूमा उमेर समूहभन्दा बढी उमेरका खेलाडीहरू पठाइएको आरोप पनि छ, के भन्नुहुन्छ ?
आरोप होइन, पुष्टि नै भैसकेको छ । यसमा खेलाडी छनौट गर्नेदेखि एन्फा पदाधिकारीसम्म 
संलग्न छन् । यो देशमा सरकार छ, यो देशमा कानुन छ र यसले देशको बेइज्जत गर्‍यो भन्ने लाग्छ भने यी सबै अपराध गर्नेहरूलाई दण्ड हुनेछ भन्ने आशा गर्छु । सम्पूर्ण फुटबलप्रेमीहरूले पनि खोजेको त्यही हो । हिजो फुटबल कहाँ थियो ? हामीले भारतलाई समेत जितेका थियौं । दक्षिण एसियामा अब्बल र एसियामा पनि माथिल्लो र्‍याङ्कमा पुगिसकेका थियौं, आज अन्तर्राष्ट्रिय बेइज्जत भएको छ । अब कुन आशाले फुटबल हेर्न जान्छन् दर्शकहरू ? जुन खेलाडीको खेल हेर्न हामी मरिहत्ते गथ्र्यौ, त्यही खेलाडीले प्रशंसकहरूको विश्वासलाई लत्याउँदै र देशकै खेलको बेइज्जत गर्दै आज जेल जानुपर्ने अवस्था आयो । फुटबललाई स्वच्छ बनाउन पनि यी सबै किसिमको अपराध गर्नेहरूले सजाय पाउनुपर्छ । 

तपाईंको शुद्धीकरण अभियान करिब–करिब पूरा भयो । अब नयाँ बाटो कोर्न तपाईंहरूको समूह सक्षम हुन्छ ? तपाईंहरूलाई एन्फाका अन्य पदाधिकारीहरूले साथ दिन्छन् ?
एन्फा अहिले ४५ जिल्लामा सक्रिय छ । तीमध्ये २२ जिल्ला हाम्रो शुद्धीकरण अभियानमा छन् । ए डिभिजनका १० क्लबमध्ये ७ वटा क्लब पनि हाम्रो अभियानमा छन् । यसरी सिधै हाम्रो बहुमत देखिन्छ । गल्ती नगर्ने वा परिबन्दमा पर्नेहरूले पनि हामीलाई साथ देलान् । जो गलत छ, उहाँहरूको त हामीले विरोध गरेकै हो । उहाँहरूलाई कानुनले समात्छ । अब फुटबलको विकास नहुने कुनै कारण छैन । 

यतिबेला फुटबलका फ्यानहरू निराश छन् । उनीहरूलाई फुटबलले गति लिन्छ भन्ने विश्वास दिलाउने आधार के–के हुन् ?
हाम्रो शुद्धीकरण अभियानले धेरै कुरा संकेत गर्छ । त्यसमा पनि हामी व्यवसायिक फुटबलमा लागिरहेका छौं । ग्रासरुटदेखि नै काम गर्छौं । हरेक जिल्लामा उमेर समूहका खेलाडी उत्पादन गछौं । ती सयौं खेलाडीबाट राम्रा खेलाडी छान्दै जान्छौं । एन्फामा आएको सबै रकम पारदर्शी ढंगले खर्च गर्छौं । यहाँभित्रका विकृति–विसंगतिहरूलाई जरैदेखि निर्मूल गर्छौं । यति भएपछि केही वर्षभित्रै नेपाली फुटबलले २० वर्षअघिको लय पक्रन्छ । 

प्रकाशित: मंसिर १४, २०७२

मंसिर १६, २०७२- विश्व फुटबलको राजनीतिमा सबभन्दा माथिल्लो तहमा पुगेका नेपाली हुन्, गणेश थापा। राष्ट्रिय टिमका कप्तानसमेत रहेका थापा दक्षिण एसियाली खेलकुद (सन् १९८४) को स्वर्णपदक विजेता नेपाली टिममा फरवार्ड थिए।

त्यसको सात वर्षपछि स्वर्ण जितेको राष्ट्रिय टिममा भने उनी छनोट भएनन्। स्वर्ण विजेता टिमका प्रशिक्षकलाई स्वदेश फर्केपछि दुव्र्यवहार गर्न भ्याएका थापा फुटबल व्यवस्थापक बन्न शक्तिकेन्द्र धाउन थाले।

कांग्रेस सरकारको पालामा राष्ट्रिय खेलकुद परिषद् (राखेप) को सदस्यसचिव नियुक्त भएका रुक्मशम्शेर राणा एन्फा अध्यक्ष पनि थिए। २०५१ सालमा एमाले सत्तामा पुगेपछि केशव स्थापित राखेपको सदस्यसचिव भए।

हालका उपप्रधान तथा परराष्ट्र मन्त्री कमल थापा (एन्फाका पूर्वअध्यक्ष पनि हुन्) का कान्छो भाइ गणेशले शक्तिकेन्द्रकै आडमा २०५१ चैतमा नेपाली फुटबलको सर्वोच्च संस्था अखिल नेपाल फुटबल संघ (एन्फा) को नेतृत्व लिए। त्यसयता उनी २१ वर्ष एन्फा अध्यक्षमा निरन्तर रहे।

अन्तर्राष्ट्रिय फुटबल महासंघ (फिफा) को इथिक्स कमिटीले घूस लिएको आरोपमा ३० कात्तिकमा १० वर्ष फुटबल गतिविधिमा प्रतिबन्ध र २० हजार स्विस फ्रयांक (करिब २१ लाख रुपैयाँ) जरिवानाको निर्णय गरेपछि मात्र थापाको फुटबल सत्ताले पूर्णविराम पायो।

२०५४–५५ को सत्ता समीकरणको खेलमा सांसद किनबेचका ठूलै खेलाडी बनेका उनी नेपाली फुटबल हाँकेकै आधारमा दक्षिण एसियाली फुटबल महासंघ (साफ) को १० वर्ष अध्यक्ष भए। उनी एसियाली फुटबल महासंघ (एएफसी) मा पनि सदस्य हुँदै उपाध्यक्षसम्मै पुगे।

उनी विश्वकप २००२ को अनुशासन समिति सदस्य, यू–२० र यू–१७ विश्वकपको आयोजक समिति सदस्यसमेत भए। उनको फुटबल राजनीति एसियाली तहकै माथिल्लो स्तरमा पुगे पनि यस अवधिमा नेपाली राष्ट्रिय टिमको प्रदर्शन भने निरन्तर खस्कँदै गयो। अन्तर्राष्ट्रिय प्रतियोगितामा राष्ट्रिय टिम उपाधिविहीन भएको २२ वर्ष भइसक्यो।

यसबीच साफ च्याम्पियनसिपको फाइनल पनि पुग्न सकेन। उमेर समूहमा पाएको सफलताको पछाडि ‘एज फिक्सिङ’ले छाडेन। वर्षौंदेखि ‘म्याच फिक्सिङ’ले जरो गाडेको पनि दसैंअघि रहस्य खुल्यो र यसमा सूचना लुकाएको थापामाथि आरोप छ। केही वर्षअघिसम्म पनि नेपाली फुटबलमा ‘आदर्श’को रूपमा रहेका उनी ‘बदनाम’ हुँदै बाहिरिए।

२०५१ चैत २१ : एमालेको नौ महिने सरकारको पालामा राष्ट्रिय खेलकुद परिषदका सदस्यसचिव केशव स्थापितले रुक्मशम्शेर राणालाई हटाएर गणेश थापालाई एन्फा अध्यक्ष बनाएको।

२०५२ असोज २७ : फिफाको मान्यता पाउन होटल अर्किडमा गरिएको ‘कोठे निर्वाचन’बाट एन्फा अध्यक्षमा निर्वाचित ।

२०५६ : दक्षिण एसियाली फुटबल महासंघ (साफ) को अध्यक्षमा निर्विरोध निर्वाचत। निरन्तर दुई कार्यकाल (१० वर्ष) साफको नेतृत्व गरेका।

२०५७ जेठ : सोह्र दिनअघि पत्र पठाएर जेठ २७–२८ गते घोषित एन्फाको निर्वाचन गोप्य रूपमा गर्न खोजिएको भन्दै उपाध्यक्ष गीता राणाले पुनरावेदन अदालतमा उजुरी गरेपछि स्थगित।

२०५७ असोज : एन्फाको विधान संशोधन गरेर निर्वाचन गर्न राखेपको निर्देशनको बेवास्ता।

२०५७ असोज २७ : एन्फा कार्यसमितिका ३१ मध्ये २१ जनाको समर्थनमा राखेपका सदस्यसचिव विनोदशंकर पलिखेद्वारा असोज २७ गते गीता राणालाई अध्यक्ष बनाइयो। एन्फा दुई समूहमा विभाजित।

२०५७ असोज ३० : राखेपले सातदोबाटोबाट प्रहरीले हटाएपछि होटल मल्लमा कोठे चुनाव गराएर थापा फेरि अध्यक्ष भएको। पहिले त्रिपुरेश्वर पछि कुपन्डोलमा कार्यालय चलाएको। यससँगै राष्ट्रिय र अन्तर्राष्ट्रिय मान्यताका दुई एन्फा अस्तित्वमा।

२०५८ वैशाख : रुक्मशम्शेर र गणेश थापाबीच सिंगापुरमा बैठक गराएर एएफसीले आवश्यक विधान परिवर्तन गरेर १६ कात्तिक, २०५८ भित्र निर्वाचन गर्न निर्देशन।

२०५८ कात्तिक २५ : रुक्मशम्सेर र गीता राणाका समूहलाई बेवास्ता गरिएको निर्वाचनबाट थापा चौथोपल्ट अध्यक्ष भएको।

२०५८ कात्तिक २९ : राखेप उपाध्यक्ष, राष्ट्रिय संघ निर्वाचन समितिको संयोजक, ओलम्पिक कमिटीका अध्यक्षको उपस्थितिमा गीता राणा एन्फा अध्यक्ष निर्वाचित।

२०५९ साउन २२ : शिक्षा तथा खेलकुद राज्यमन्त्री एनपी साउदले राखेप सदस्यसचिप विनोदशंकर पलिखे, गीता राणा र गणेश थापाको बैठक गराएर फुटबललाई सही दिशामा लाने सहमति।

२०५९ साउन २३ : कार्यसमितिको बहुमत सदस्यको अविश्वास प्रस्तावमार्फत राखेपले गीता राणालाई एन्फा अध्यक्षबाट बर्खास्त गरेपछि कर्माछिरिङ शेर्पा कार्यवाहक अध्यक्ष। सर्वोच्चको अन्तरिम आदेशले गीता राणालाई पदमा कायमै राख्यो।

२०५९ मंसिर २ : कर्माछिरिङ शेर्पासँग हातेमालो गर्दै गणेश थापा ताल्चा फोडेर एन्फा कम्प्लेक्स फर्किए।

२०५९ मंसिर ४ : शिक्षा तथा खेलकुद सहायक मन्त्री रवीन्द्र खनालको उपस्थितिमा एन्फा एकीकरण भएको भन्दै पत्रकार सम्मेलन। थापाले कर्माछिरिङलाई वरिष्ठ उपाध्यक्ष बनाए। तर, २ माघको साधारणसभा (एक समूहको) मार्फत गीता राणा फेरि अध्यक्ष निर्वाचित। दुई एन्फा कायमै।

२०६० : गणेश थापा एएफसी कार्यसमितिको सदस्यमा निर्वाचित। लगातार दुई कार्यकाल (८ वर्ष) एएफसी सदस्य भए।

२०६० असोज ६ : राखेप र फिफाको मान्यता नपाएपछि गीता राणाले सर्वोच्चमा लगाएको मुद्दा तामेलीमा राख्न लगाइन्। थापाको नेतृत्वको एन्फा मात्र अस्तित्वमा।

२०६२ : याक एन्ड यती होटलमा भएको साधारणसभामार्फत गणेश थापा पाँचौंपल्ट एन्फा अध्यक्षमा निर्वाचित।

२०६२ : एएफसी प्रेसिडेन्ट्स कप आयोजक समितिको प्रमुख।

२०६३ : फुटबल क्लबलाई सुविधा र अधिकार कम भएको भन्दै राजधानीका ए र बी डिभिजन क्लबले आन्दोलन थाले। एन्फाको समानान्तर संघको रूपमा राखेपमा विजयनारायण मानन्धर (अध्यक्ष) र इन्द्रमान तलाधर (महासचिव) को अगुवाइमा नेपाल फुटबल संघ दर्ता। घरेलु फुटबल फेरि विवादमा, गतिविधि ठप्प।

२०६३ : एएफसी च्यालेन्ज कप आयोजक समितिको प्रमुख ।

२०६५ मंसिर २२ : युवा तथा खेलकुद मन्त्री गोपाल शाक्यको पहलमा सातबुँदे सहमतिसहित एन्फा–नेपाल फुटबल संघको विवाद अन्त्यको घोषणा।

२०६६ : गणेश थापा छैटौंपल्ट एन्फा अध्यक्ष, नेपाल फुटबल संघका विजयनारायण उपाध्यक्षमा निर्वाचित। नेपाल फुटबल संघकै इन्द्रमान तुलाधरलाई प्रमुख कार्यकारी अधिकृत बनाइएको।

२०६८ : गणेश थापा दक्षिण तथा मध्य एसियाली क्षेत्रबाट एएफसी कार्यसमितिको उपाध्यक्षमा निर्वाचित

२०७० : गणेश थापा सातौंपल्ट एन्फा अध्यक्ष निर्वाचित।

२०७० चैत २६ : लिग सकिए पनि त्यसको तयारी खर्च र पुरस्कार नदिएपछि हिमालयन शेर्पा, सरस्वती, फ्रेन्ड्स र मछिन्द्र क्लबद्वारा एन्फाको विरोध। क्लब समन्वय समिति गठन।

२०७१ जेठ २६ : एन्फा उपाध्यक्ष कर्माछिरिङ, विजयनारायण श्रेष्ठ र सदस्य पंकजविक्रम नेम्बाङद्वारा थापाले अनियमितता गरेको र एक्लौटी ढंगले एन्फा चलाएको भन्दै संसद्को सार्वजनिक लेखा समिति, प्रधानमन्त्रीको कार्यालय, राष्ट्रिय सतर्कता केन्द्र, युवा तथा खेलकुद मन्त्रालय, अख्तियार दुरुपयोग अनुसन्धान आयोग र सम्पत्ति शुद्धीकरण विभागमा उजुरी।

२०७१ असोज १२ : सार्वजनिक लेखा समितिले कुल ५८ करोड १६ लाख १२ हजार ७ सय ५० रुपैयाँ अनियमितता गरेको ठहर गर्दै गणेश थापामाथि अनुसन्धान अघि बढाउँदै कारबाही गर्न अख्तियारलाई निर्देशन।

२०७१ भदौ १३ : राप्रपा नेपालको सिफारिसमा मन्त्रिपरिषद्बाट गणेश थापा संविधानसभाको सभासदमा मनोनीत।

२०७१ कात्तिक ३ : पदीय जिम्मेवारीबाट हटाउन लेखा समितिको निर्देशनअनुसार गणेश थापा र कोषाध्यक्ष विराजंग शाहीद्वारा दुई महिना पद स्थगन गर्ने निर्णय।

२०७१ कात्तिक १८ : फिफाको इथिक्स कमिटीद्वारा गणेश थापालाई अनुसन्धानमा रहेको भन्दै १२० दिन फुटबल गतिविधिबाट अलग गरिएको।

२०७१ माघ २७ : थापालाई चोख्याउँदै अख्तियार दुरुपयोग अनुसन्धान आयोगले एन्फामा आर्थिक अनियमितता भएको उजुरीमाथिको अनुसन्धानलाई तामेलीमा राख्ने निर्णय।

२०७१ चैत ६ : फिफाको इथिक्स कमिटीले फेरि फुटबल गतिविधिबाट थापा ९० दिन अलग राखिएको निर्णय।

२०७२ असार ६ : थापा पुन: एन्फाको जिम्मेवारीमा फर्किएको। कार्यवाहक अध्यक्ष ललितकृष्ण श्रेष्ठको निधन भएपछि १३ दिन कार्यालय बन्द गर्ने भनिए पनि दसौं दिनमै उनले फेरि जिम्मेवारी सम्हालेको एन्फाले एएफसीलाई पत्राचार।

२०७२ कात्तिक ३० : फिफाको इथिक्स कमिटीद्वारा फुटबल गतिविधिमा १० वर्ष प्रतिबन्ध र २० हजार स्विस फ्रयांक (करिब २१ लाख रुपैयाँ) जरिवानाको निर्णय।

प्रकाशित: मंसिर १६, २०७२