दसैंका लागि घर फर्किनु अगाडि गायिका नलिना चित्रकार ज्याक्सन हाईटस्थित ह्याप्पी किचेनमा भेटिइन् । ह्याप्पी किचेनमा उनी पनि 'ह्याप्पी मूड'मा थिइन् । सायद किचेनको वातावरणले पनि यस्तो मुड बनाइ दिएको हुन सक्छ । सफा र चिटिक्कै सजाइएको सानो 'डाइनिङ हल'मा संगीतको मिठाससँगै मनिता र बीरेन्द्र गुरुङ ह्याप्पी मुहारमा जापानिज परिकार चखाउन तयार थिए ।
'नलिनाजी, निकै ह्याप्पी मूडमा देखिनु भएको छ नि !' पंक्तिकारको यो कौतुहलता सुन्ने बित्तिकै उनले प्रस्ट्याइन्, 'म त जहिले नि ह्याप्पी नै रहन्छु !' त्यसो त ह्याप्पी किचेनका संचालक मनिता र बीरेन्द्र पनि सधै ह्याप्पी देखिनेमै पर्दछन् । संजोक नै भन्नुपर्छ यो जोडीलाई व्यापारिक नाम पनि ह्याप्पी किचेन जुरेको छ । खण्डे थालमा क्यालिफोर्निया रोल, फ्राई स्रिम्प, सलाद सल्मो माछालगायत विभिन्न जापानिज परिकार राखेर बीरेन्द्रले नलिनाको अगाडी टेबलमा राखे ।
चाइनिज, जापानिज, कोरियन खानामा प्रयोग हुने 'चप् स्टिक' चलाउन भने नलिनालाई गीत गुनगुनाउन जति सहज देखिएन । त्यसपछि मनिताले उनलाई 'बेबी चप् स्टिक' थमाई दिईन । 'हातैले खाए हुन्दैन र ?' दालभात, तरकारी, आलूतामा, गुन्द्रुक र सिन्कीलाई हातले मुछेर खाँदै हुर्केकी नलिनालाई पंक्तिकारको अर्को सोधाई । 'नहुने त हैन, तर ह्याप्पी किचेनमा अनह्याप्पी मूड बनाउनु जस्तै होला कि फेरि !' नलिनाले कुटिल जवाफ दिईन ।
नेपाली खानलाई चप् स्टिकले खाँदा हुने बेमज्जा जस्तै जापानिज खानलाई नेपाली पाराले खाँदा बेमज्जा हुने उनले प्रस्ट पारिन । चप् स्टिकले क्यालिफोर्निया रोललाई च्याप्प समातेर उठाउने दुइ चार पटकको प्रयास पछि अन्तत उनी सफल बनिन् । बिस्तारै चपाएर उनलाई सबभन्दा मनपर्ने जापानिज खानमध्येको क्यालिफोर्निया रोलको स्वाद मज्जाले लिईन् नलिनाले । 'पहिलो गीत गाउन यस्तै प्रयास गर्नु परेको थियो ?' पंक्तिकारले फेरि प्रश्न फ्याँके उनीतिर । हरेक गीतलाई पहिलो सम्झेर गरेको प्रयासले बढी सफलता दिने अनुभव सुनाउदै उनले जवाफ फर्काईन, " म हरेक गीतलाई पहिलो सम्झेर मिहिनेत गर्छु ।"
नलिनालाइ खान पस्कदैं ह्याप्पी किचेनका बीरेन्द्र गुरूङ ।
१५ बर्षकै उमेरमा 'तिम्रो अधर, तिम्रो नजर' बोलको गीत पहिलोपटक रेकर्ड गराएयता नलिना चर्चित रहदैं आएकी छिन् । सांगीतिक यात्रामा उनी दुई दशकमाथि यता सक्रिय छिन् । यो समयावधिमा कति समकालीन गायकगायिका निकै अगाडी बढे, कति सांगीतिक क्षेत्रबाट नै पलायन भए, नलिना भने आफ्नै गतिमा अगाडी बढिरहेकी छिन । सफल रहेकी छिन । 'पानी पानी भयो मेरै मन पनि' लगायत गीतले उनलाई सांगितीक दुनियाँमा राम्रै चिनायो ।
नलिनाका अनुसार उनी क्वानटिटीमा भन्द क्वालिटीमा विश्वास गर्छिन् र त्यसैअनुसार काम गर्दै आएकी छिन् । आठ वटा एल्बम सार्बजनिक गरिसकेकी नालिनाले स्वर रेकर्ड गरेको संख्या भने २०० नाघेको बताईन् । नेपालीबाहेक मैथिली, नेवारीमा गीत गएकी नलिनालाई सबै भाषाभाषीको गीत गाउने धोको छ । नलिनाले सांगीतिक दुनियाँमा प्रवेश गरेको जमाना एनालोग प्रविधिको क्यासेट टेप थियो भने अहिले डिजिटलको जमाना । उनले आफुलाई यो परिवर्तनसँगै समायोजन गरेकी छिन् ।
दर्शक–स्रोता र आयोजकप्रति उनी उत्तिकै इमान्दार पनि छिन् । आफ्नो नाम राखेर कार्यक्रमको प्रचार भई सकेपछि अप्ठ्यारो परिस्थितिमा पनि सहयोग गर्नुपर्ने उनी बताउछिन् । बुबाको क्रिया बसिरहेको समयमासमेत नेपालगन्जमा प्रस्तुति दिन जानु परेको उनले सुनाईन । पछिल्लो समय उनी अमेरिका केन्द्रित रहेकी छिन् । 'हामी कलाकारलाई जताजता नेपालीले बोलाउछन्, त्यहाँ पुग्नु हाम्रो जिम्मेवारी हो', उनले भनिन् ।
नेपालमा भूकम्प हुँदा अमेरिकामै थिईन उनी, तर केही दिनभित्रै नेपाल पुगेर पीडितसँग दुःख साटासाट गरेपछि अमेरिका फर्केकी उनले ३ महिनाको बसाईंमा अमेरिकाको थुप्रै सहरमा सांगीतिक प्रस्तुति दिईन । जहाँ जादा पनि नेपालीहरु ह्याप्पी भेटिदा चाहि आफुलाई निकै गर्व लाग्ने उनले सुनाइन् । उनले भनिन, 'अनि त्यो बेला म पनि अत्यन्तै ह्याप्पी बन्छु ।'
